Rek Jadi Anggota ISIS

Kacaritakeun dina hiji mangsa Nyi Iteung menta tulung ka Si Abah, cenah Si Kabayan ayeuna keur di Bandara Sukarno Hatta, manehna rek indit pisan ka Suriah, jadi anggota ISIS.

"Tulungan Abah, bisi Kang Kabayan kumaonam, da goreng patut oge nyaah Iteung ka salaki teh," ceuk Nyi Iteung bari segruk ceurik hareupeun Si Abah.

"Na teu dipapatahan ku maneh, Teung?" ceuk Si Abah.

"Mapatahan budak parantos dewasa mah Abah, hese atuda," tembal Nyi Iteung bari nyusutan cimatana.

"Ari Nyi Iteung, tara biasana ceurik, naha ayeuna make balilihan kitu?" ceuk Ustad nu kaparengan liwat, nyampeurkeun bari semu heraneun ningali Nyi Iteung nyegruk.

"Tadina mah Nyi Iteung ge hayang milu, ngan euweuh ongkosna, jadi sedih Iteung teh," tembal Nyi Iteung.

"Har sugan teh nyaah ka Si Kabayan, sihoreng hayang milu geuningan?" Pa Ustad ngabelenyeh seuri.

"Ari jeung Iteung mah sugan, moal kamalinaan. Sieun Iteung teh."

"Sieun naon Nyi ?"

"Ma’lum Abah, di nagara Arab mah loba onta…."

"Enya...., na kumaha kitu lamun loba onta?"

"Sieun rareuneuh we ontana Abah, ma’lum Kang Kabayan mah dedegler," ceuk Nyi Iteung bari nyusutan cimatana.

Si Abah buru-buru nelepon ka patugas bandara. Si Kabayan cenah kudu dicekal, bisi ngerakeun nagara jeung bangsa. Kumaha meureun lamun onta bikang aranakan tur huluna siga Si Kabayan.

"Salaku sesepuh kampung, tada teuing kuring wirangna, boga minantu jadi pamacek onta," ceuk Si Abah bari megat oplet, muru ka bandara.

Si Kabayan dititah ngadagoan ku patugas bandara, manehna diuk dina rohangan tamu bandara. Ceuk patugas bandara, Si Kabayan teu bisa berangkat ka Suriah sabab pasporna teu uni.

"Maenya paspor ku jengkol sakeresek. Lamun lima belas juta mah, aya nu mangnyieunkeun," ceuk eta patugas bandara.

"Kabayan, na ari ilaing rek ka mana?" ceuk Si Abah sanggeus panggih jeung Si Kabayan di bandara.

"Ka Suriah, Abah," tembal Si Kabayan.

"Geuning boga ongkos?"

"Aya, ieu keur nungguan sumbangan ti urang Arab."

"Kade bisi kaolo, pan di Suriah mah loba ISIS," ceuk Si Abah. Si Kabayan ngahuleng. Manehna balaka hayang jadi anggota ISIS. Atuh si Abah mani nyureng.

"Enyaan maneh teh teh rek jadi anggota ISIS?" ceuk Si Abah.

"Bener Abah, sakantenan rek neangan santri awewena," tembal Si Kabayan.

"Ari ceuk ilaing, ISIS teh naon kitu, boa-boa ilaing katipu?" ceuk Si Abah bari melong ka Si Kabayan.

"Ari saur Kang Encep mah, ISIS teh  singketan tina Ikatan Santri Istri. Janten lamun bade milarian jodo anu ihlas kana kamalaratan salaki, kudu jadi anggota ISIS, saurna. Balanjana cekap ku kulhu," ceuk Si Kabayan.

"Percaya ?"

"Percaya we Abah,  da geuning di lembur urang mah awewe teh ampir sadayana matre, malah anu teu garaduh ge milarian damel ka luar negeri, belaan ti nyuhunkeun pegat talak ka salakina. Kiyamat….Abah," ceuk Si Kabayan.

"Sugan teh rek milu perang," ceuk Si Abah.

"Na ari Abah, atuh perang mah kalahka maragatkeun nyawa sorangan," ceuk Si Kabayan.

"Ana kitu mah, katipu….katipu, ari Nyi Iteung rek dikamanakeun…?" ceuk Si Abah bari ngutek-ngutek curukna.

"Kamari teh nyarita, cenah Iteung rek gawe di Abu Dabi, hayang boga bantal eusina duit, jadi uing pusing," ceuk Si Kabayan.

Si Abah ngajakan balik bari ngajangjikeun, cenah, Si Kabayan rek dibere garapan, sawah sakotak.

"Ari kitu onaman, ngan ulah sawah Iteung atuh. Abah, pan eta mah geus ledug," ceuk Si Kabayan bari nuturkeun mitohana.